Iturria agor ez dadin
Joxe Mari Auzmendi hezkuntza bekaren lehen deialdia aurkeztu dute Hik Hasik eta Hernaniko Udalak. Auzmendik bere ibilbidean jorratu zituen lau hezkuntza balioren inguruko proiektuak lagunduko ditu Hernaniko Udalak eta Hik Hasik sustatuko bekak: hobekuntza pedagogikoa; euskara eta euskal kulturaren biziberritzea; herri hezitzailea eta inklusioa.
Hik Hasi egitasmo pedagogikoak Joxe Mari Auzmendi hezkuntza beka sortu du Hernaniko Udalaren laguntzarekin, eta dagoeneko lehen deialdia abian da. Auzmendik hezkuntza munduari egindako aitorpena da, eta era berean, hark hasitako ibilbideari jarraipena emateko modua izan nahi du. Izan ere, Auzmendik bere ibilbide osoan jorratu zituen lau hezkuntza balioren inguruko proiektuak lagunduko ditu Hernaniko Udalak eta Hik Hasik sustatuko hezkuntza bekak: hobekuntza pedagogikoa; euskara eta euskal kulturaren biziberritzea; herri hezitzailea eta inklusioa. Iragan ekainaren 10ean aurkeztu zuten beka Hernaniko udaletxean herriko alkate Xabier Lertxundik, hezkuntza zinegotzi Oier Agirresarobek, Joxe Mari Auzmendiren alaba Izaro Auzmendik eta Hik Hasiko Mikel Agirrezabalak eta Ainhoa Azpirotzek.
Hernaniko alkateak aurkezpenean gogoratu zuen bezala, iazko otsailean hil zen Joxe Mari Auzmendi. “Izatez ez zen hernaniarra, baina bere bizitzako urte gehienak Hernanin bizi izan zituen. Hernaniko herria eta Udala zordun zen Joxe Marik egindako bideari jarraipena emateko. Eutsi egin genion Hik Hasik egindako proposamenari, erakundeoi baitagokigu lan horri jarraipena ematea. Dena den, bekaren eremua ez da Hernanira mugatuko, Euskal Herri osoan ezaguna izan da Joxe Marik egindako lana, eta Euskal Herri osoa uztartu nahi duen beka da”.
2020ko otsailean hil zen Joxe Mari Auzmendi. Baina, iturri agortezina zen egitasmo pedagogikoaren sustatzaile eta arima izan zena, Agirrezabalak aurkezpen ekitaldian gogoratu zuen bezala: “Joxe Mari Auzmendi, sekula agortzen ez zen iturria. Titular hori jarri genuen Hik Hasi aldizkarian gure egitasmo pedagogikoaren sortzaile eta bultzatzaile zenaren heriotzaren berri emateko idatzitako erreportaje luzean, 2020ko otsailean. Eta hauxe dugu agortzen ez den iturri horren beste adibide bat: pasa den otsailaren 26an, Joxe Mari Auzmendiren omenez Hernanin egin genuen ekitaldian aurreratu genuen bezala, Hik Hasi egitasmo pedagogikoak Hernaniko Udalaren laguntzarekin Joxe Mari Auzmendi hezkuntza beka sortu du”.
Joxe Mari Auzmendik ezaugarri berezi batzuk zituen, kemen eta argi handiko pertsona zen, indar berezikoa eta bateratzailea zen, Agirrezabalak gogoratu zuen eran. “Langile porrokatua. Batik bat hezkuntzara bideratu zuen bere lana, baina hezkuntza herri bat josteko hari gisa ulertzen zuen, eta beti balioetan oinarritzen zen. Hala esaten zuen: ‘Hezkuntzak ekarriko du gizarte hobe bat, gizarte justuago bat, orekatuago bat, parekideago eta euskaldunago bat. Baina hezkuntzak eginkizun handi hori beteko badu, bikaina, kalitatekoa izan behar du’. Auzmendiren hezkuntza balioei jarraipena emateko asmoz, eta hezkuntza komunitateari ekarpena egiteko ilusioz, sortu dugu aurkezten dizuegun hezkuntza beka hau, hezkuntza komunitate osoari zabaldua dagoena”.
Hik Hasiren izenean eskerrak eman zituen Agirrezabalak: “Joxe Mari Auzmendiren familiari lehendabizi eta Hernaniko Udalari ondoren, erakutsitako babesagatik. Ametsak egia bihurtzeko, ezinbestekoak dira bidelagunak, eta kasu honetan ere, Joxe Mari Auzmendi hezkuntza beka abian jartzeko ezinbestekoa izan da Hernaniko Udalak eskaini digun babesa eta laguntza. Joxe Mari Azkaraten jaio eta Legazpin hazi bazen ere, oso lotua zegoen Hernaniri, Hernaniko herri bizitzari, eta eskertzekoa da, benetan gaur hemen aurkeztu ahal izatea bere izena daraman Hezkuntza beka hau”. Joxe Mari Auzmendiri egindako aitortza eskertu zuen Izaro Auzmendik familiaren izenean, “nahiz eta bera ez zen errekonozimendu zalea”. Eskerrak eman zizkien Hernaniko Udalari eta batez ere herriari.
Lau balio, hasteko
Lau gai horietako batean (hobekuntza pedagogikoa; euskara eta euskal kulturaren biziberritzea; herri hezitzailea eta inklusioa) ardazturiko proiektu bat lagunduko du beka honek. Proiektu berri bat abian jartzeko edota dagoeneko indarrean dagoen bat bultzatu eta bideratzeko izango da eta hezkuntza komunitate osoari zuzendua dago. Euskal Herri osoko ikastetxeak, hezitzaile taldeak, guraso taldeak, aisialdi taldeak, euskara elkarteak, herri mailan osatutako eragile-taldeak eta abar aurkeztu ahal izango dira. Eragile desberdinen arteko elkarlana hobetsiko da.
Bekaren iraupena bi ikasturtekoa izango da. Eta bekaren zenbatekoa 12.000 eurokoa izango da.
Epaimahaia Hernaniko Udalaren ordezkari batek eta Hik Hasi egitasmo pedagogikoko hiru hezkuntza adituk osatuko dute. Hautatutako proiektuari jarraipena egiteko, beti ere proiektuaren ezaugarriak kontuan hartuta, aholkulari pedagogikoa izendatuko du epaimahaiak onuradunekin adostuta.
Balioetan aurrera egiteko bekaren oinarriak
Sarrera
Deialdi honen helburua Joxe Mari Auzmendiren hezkuntza balioei jarraipena eman eta balio horietan oinarrituriko hezkuntzaren eginkizun eraldatzaileak dituen proiektua laguntzea da.
Joxe Mari Auzmendik euskara eta euskal kulturaren, hobekuntza pedagogikoaren, herri hezitzailearen eta inklusioaren inguruan ardaztu zuen bere ibilbidea: “Hezkuntzak ekarriko du gizarte hobe bat, gizarte justuago bat, orekatuago bat, parekideago eta euskaldunago bat. Baina hezkuntzak eginkizun handi hori beteko badu, bikaina, kalitatekoa izan behar du”.
Hezkuntza komunitateari zuzenduriko beka hau Joxe Mari Auzmendik sortu eta gidatu zuen Hik Hasi egitasmo pedagogikoak sustatzen du eta Hernaniko Udalak diruz laguntzen.
1. XEDEA
Hezkuntza komunitateari zuzenduriko beka hau proiektu berri bat abian jartzeko edota dagoeneko indarrean dagoen bat bultzatu eta bideratzeko izango da. Proiektuak lau eremu hauetako batean kokatua egon behar du:
Hobekuntza pedagogikoa
Gizartea aldatzen doan neurrian aldatzen da hezkuntza ere. Hezkuntza berrikuntza funtsezkoa da gizarte batentzat, iraganeko gaizki-eginak gainditu eta etorkizun hobe bat eraikitzeko bidean.
Euskara eta euskal
kulturaren biziberritzea
Euskararen erabilera bultzatzeko eta indartzeko eta euskal kulturaren transmisioa sustatzeko ekimenak izatea. Haur eta gazteen eleaniztasuna sustatzeko bidea euskararen eskutik egitea da helburua, euskara eta euskal kultura bizitzarako tresna eraginkor bihurtuz.
Herri hezitzailea
Jolasa eta sormena ikasteko eta garatzeko tresnatzat dituen haurren kultura aitorturik, haurrei benetako parte-hartze eta erabakitzeko ahalmena ematea. Haurrek beraiek eraikitako aisi hezitzailearen eta euskaldunaren bitartez, aniztasunean berdinak eta parekideak izanez, eta ingurumen naturala eta kulturala zainduz, komunitate-sarea eta auzolana indartzea da herri hezitzailearen helburua, pertsonen arteko harreman osasuntsu, justu eta asegarriak jostea.
Inklusioa
Guztiontzat beharko lukeen herri inklusiboa eraikitzeko, oso garrantzitsua da izaera bereziko gaiak lantzen dituzten haur eta familien ongizatea eta balioa aitortzea eta ikusaraztea. Elkarte, haur eta familia hauek transmititzen dituzten balioak jaso behar ditu hezkuntza-komunitateak, gizarte moduan aberastu eta hezteko.
2. IRAUPENA ETA
ZENBATEKOA
Bekaren iraupena bi ikasturtekoa izango da.
Bekaren zenbatekoa 12.000 eurokoa izango da. Kopuru horretatik zenbateko bat proiektua bultzatzeko eskainiko den aholkularitza pedagogikora bideratuko da.
3. HIZKUNTZA
Proiektua euskaraz landu, idatzi eta aurkeztuko da.
4. ONURADUNAK
Hezkuntza-komunitateari zuzendutako beka honetara Euskal Herri osoko ikastetxeak, hezitzaile taldeak, guraso taldeak, aisialdi taldeak, euskara elkarteak, herri mailan osatutako eragile-taldeak eta abar aurkeztu ahal izango dira. Eragile desberdinen arteko elkarlana hobetsiko da.
5. ESKAERA EGITEKO EPEA ETA LEKUA
Proposamenak aurkezteko epea 2021eko urriaren 1ean amaituko da eta epaimahaiak, aurkeztutako lanak aztertu ostean, azaroaren 2an jakinaraziko da saritutako proiektua zein den.
Dokumentazio guztia gutunazal batean sartuta honako helbide honetara bidali beharko da: Hik Hasi bulegoa, Errekalde hiribidea 59, Aguila eraikina 1-1. solairua, 20018 Donostia, honako izenburua jarrita: Joxe Mari Auzmendi hezkuntza bekaren lehen deialdia.
Aurkeztu beharreko dokumentazio guztia digitalki ere aurkeztu daiteke, fisikoki aurkeztu beharrean. Kasu horretan, dokumentu guztiak PDF bihurtu, karpeta bakar batean bildu, eta posta elektronikoz bidali beharko da, honako helbidera: jmauzmendibeka@hikhasi.eus
Aurkeztutako dokumentazioa osatu gabe balego edo oinarri hauetan eskatutako baldintzak beteko ez balira, interesdunek hiru eguneko epea izango dute dokumentazioa zuzendu edo osatzeko. Hala egin ezean, eskatzaileak atzera egin duela ulertuko da.
6. ESKAERA EGITEKO
DOKUMENTAZIOA
Parte hartu ahal izateko honako dokumentazio hau aurkeztu beharko da:
• Eskaera-orria (I. eranskina) behar bezala beteta.
• Proiektuaren nondik-norakoa: izenburua, azalpena, helburuak, lan-
lerroak, metodologia, aurrekontua eta lan-plana.
• Parte-hartzaileen (ikastetxea, hezitzaile taldea, guraso taldea, aisialdi taldea, euskara elkartea, herri mailan sorturiko eragile-taldea eta abar) ibilbidea.
Hau guztia gehienez 15 orrialdetan jaso behar da (DIN A-4 formatua, 12 tamainako hizkia eta ohiko tartea).
7. EPAIMAHAIA ETA
IRIZPIDEAK
Lau izango dira aurkeztutako lanak aztertuko dituen epaimahaiko kideak: Hernaniko Udalaren ordezkari bat eta Hik Hasi egitasmo pedagogikoko hiru hezkuntza-aditu.
Epaimahaiak proiektuak ebaluatu eta hautatzeko, honako irizpide hauek hartuko ditu kontuan:
• Beka honen xede-atalean jaso diren ezaugarriekin bat egiten duen proiektua izatea (hobekuntza pedagogikoa; euskara eta euskal kulturaren biziberritzea; herri hezitzailea edota inklusioa).
• Proiektuaren interesa, premia, onura, zuzentasuna eta bideragarritasuna.
Hautatutako proiektuari jarraipena egiteko, betiere proiektuaren ezaugarriak kontuan hartuta, aholkulari pedagogikoa izendatuko du Epaimahaiak onuradunekin adostuta.
8. BEKAREN ORDAINKETA
Ordainketa modu honetan egingo da:
• Kopuru osoaren %20 (gehienez) aholkularitza pedagogikora bideratuko da.
• Onuradunak jasoko duen zenbatekoaren %40 proiektua hautatzen den une berean emango da.
• Gainerako %60a bi zatitan ordainduko da onuradunak eta epaimahaiak adostutako epeetan, betiere bekak irauten duen bi ikasturteko epe-mugaren barruan. Ordainketa hauek egin ahal izateko, onuradunak zehaztu egin behar du zer lan egin duen eta zein aurreikuspen eta lan- plan duen hurrengo hilabeteetarako.
9. ONURADUNEN
BETEBEHARRAK
Honako hauek dira bekaren onuradunak bete beharrekoak:
• Hamar eguneko epean beka onartzen duela jakinaraztea. Aurreikusitako lan-programa ezingo dela bete edo kalitatea ez dela bermatuko jabetuz gero, beka itzultzeko konpromisoa hartzea.
• Bekaren helburuei lotutako lan-programa garatzeko dagozkion jarraipen-saioak egitea epaimahaiko kideekin edota aholkulari pedagogikoarekin.
• Proiektuan aurreikusi eta jasotako helburuak, metodologia eta lanak garatzeko konpromisoa hartzea.
• Proiektua adierazitako epean entregatzea.