Tinko Euskara Elkartea: Euskara pantaila handian ere behar dugulako

2018-10-01

‘Euskara zinema aretoetan’ programaren baitan, Tinko Euskara Elkarteak prestatu du ikasturte berrirako eskaintza. Adin tarte desberdinetan banatuta, orotara zortzi film eskainiko dituzte egitasmoan parte hartuko duten ikastetxeetan. Horrekin batera, film horietan lantzen diren gaien inguruko material didaktikoa ere landu du elkarteak 25 urteko ibilbidea osatu duen honetan. 

 
 

Grufaloa, A zer nolako heroiak, Albert, Sagu & Pagu, Zipi & Zape, Asterix & Obelix, Pan, eta Handia. Guztiak pantaila handian eta euskaraz. Horiek dira Tinko Euskara Elkarteak aurtengo ikasturtean Euskal Herriko hainbat ikastetxetan eskainiko dituen filmak. 

Izan ere, hizkuntzaren normalizazio prozesuan aurrera egiteko, Tinko Euskara Elkartean beharrezkoa ikusten dute haurrek zinema euskaraz ikusteko aukera izatea eta ohiturak hartzea txikitatik. Elkarteko ordezkari den Iñigo Arandiak aipatzen duenez, “zinema gakoa da euskararen normalizazioan, ametsak eragiten dituelako. Eta eskolaren testuinguruarekin uztar-tzeak, aktibitate dibertigarri batean bihurtzen du, haurrek euren gelakideekin partekatzen dutelako zinea, pantaila handian euskaraz ikusteko esperientzia”. 

Elkartea sortu zutenetik, 3 eta 16 urte bitarteko haur eta eskola umeen-tzako “erakargarriak, dibertigarriak eta hunkigarriak” diren filmak presta-tzen aritu dira, baita film horietan lantzen diren gaien inguruko material didaktikoa ere. Hezkuntza arloan lanean diharduten mediku, psikologo eta pedagogoz osatutako Durangoko Sasoia elkartearekin osatzen dute material didaktikoa elkarlanean eta Arandiarentzat, “ikasle eta hezitzaileentzat filmaren balioak identifikatu, ulertu eta horietaz hausnartzeko tresna dira”. 

Ikastetxeekin egiten duten dinamikaz galdetuta, Arandiak aipatzen du oso modu errazean egiten dutela elkarlana: “Ikastetxe bakoitzak gure eskaintza jaso ondoren, egokiena iruditzen zaien filma aukeratzen du, dagokion udalerriko zineman ikusteko. Emanaldia baino astebete lehenago, email bat bidaltzen zaio ikastetxeari data, filma eta ordutegia gogoraraziz, material didaktikoarekin batera.Emanaldi egunean, zineman harrera egin eta filma ikusten dute. Prozesua amaitzeko galdetegi bat osatzeko eskatzen diegu, proiektuaren eta filmen inguruko balorazioak egiteko etab.”.

 

25 urteko ibilbidea

Ikasturte berezia izango da honakoa elkartearentzat. Izan ere, mende laurdena bete du Tinkok euskarak pantaila handian ere tokia izan dezan lanean. Euskara Zinema Aretoetara programaren baitan, filmak banatzeko eskubideak lortu, horiek bikoiztu, material didaktikoa sortu eta banatu dute ikastetxe, hornitzaile, udal eta banatzaile sare zabal batean barnean. Arandiak dio 25 urteko ibilbidearen “balorazioa hobeezina” dela, eta honakoa gaineratzen du: “Oso sendotua dagoen proiektua dela esan dezakegu. Izan dira garai hobeak, krisi ekonomiko garai aurrekoak, esaterako, baina baita okerragoak ere. Iazko ikasturtea oso oparoa izan zen, eta gainera, lehen aldiz, Nafarroan ere lanean hasi gara”. 

Gaur egun Hego Euskal Herriko 300 ikastetxek parte hartzen dute proiektuan eta 80.000 ikusle inguru izaten dituzte urtero. 25 urte hauetan, berriz, 1,6 milioi haurrek ikusi dituzte Tinkok euskarara bikoiztu eta banatutako filmak, 100 inguru.

Etorkizunari begira, lau erronka nagusi aipatzen ditu Arandiak: “Batetik, Euskal Autonomia Erkidegoan
proiektuan parte hartzen ez duten ikastetxe horietara iristea izango dugu erronka. Bigarrenik, Nafarroan proiektua sendotzea dugu helburu; harremanak sortu, landu, elkar ezagutu, proiektua ezagutzera eman etab. Hirugarrenik, Ipar Euskal Herrian ere saretu nahi dugu eta bertako ikasleek ere euskarazko zinema ikusteko aukera izan dezaten bermatzea izango da erronka. Eta amaitzeko, Europan ere saretzen hasiak gara. Batez ere guretzat egokiak izan daitezkeen film berriak lortzeko, esperientziak partekatzeko, bereziki haur eta gazteek zinemagintzari buruz duten ezagutza eta kultura sustatzeko”. 

2018-10-01