HIK HASI ETA EUSKAL MUNDUA

2021-04-01

ALFREDO HOYUELOS   
FILOSOFIA ETA HEZKUNTZA ZIENTZIETAN
DOKTORE EUROPARRA

 
 

Ni Hik Hasirekin murgildu nintzen euskal munduan, Hik Hasik euskaraz aritzeko aukera eman zidan, eta horrek mundu berri bat ireki zidan, euskaraz aritzeko jendea, testuinguruak eta aukerak.
Italiara joan aurretik, euskara ikasten ibili nintzen eta Hizkuntza Eskola Ofizialean 4. mailara arte egin nuen. Handik itzuli nintzenean, ez nion segituan heldu 5. mailari, Iruñeko Udalaren haur-eskolen proiektua martxan jartzeari eman bainion lehentasuna. Baina, handik gutxira, 1995. urtearen inguruan, euskarazko eskoletara bueltatzea erabaki nuen, bai EGA ateratzeko eta baita gehiago sakontzeko ere.
1997an, Hik Hasik bigarren jardunaldiak antolatu zituen Iruñean, Haur eta gaztetxoen marrazki-ekoizpenaren bilakaera izenekoak, eta jardunaldi hartan, besteak beste, Isabel Cabanellasek eta biok gure ikerketa aurkeztu genuen: Mensajes entre líneas. Diálogos entre la forma y la materia. Gaztelaniaz aurkeztu genuen.
Handik aurrera, harreman dezente izan nuen Hik Hasikoekin, beste prestakuntza eta jardunaldi batzuk zirela-eta. Joxe Mari Auzmendik eta Josi Oiarbidek beti galdetzen zidaten ea noiz egingo nuen euskaraz. Oraindik ez nintzen ongi eta seguru sentitzen jendaurrean euskaraz hitz egiteko, baina momentu batean pausoa eman nuen, bota zidaten erronkari heldu nion, eta neure buruari probatzeko aukera eman nion.
Eta... ordutik honakoa oso polita izan da. Hainbat jardunaldi egin ditu Hik Hasik 25 urte hauetan Donostian eta Bilbon, eta Reggio Emiliako esperientziari lotutakoetan koordinazio-lanak eta aurkezpenak egiten aritu naiz, euskaraz. Ondoren, Hik Hasiren 0-3 etapako hezitzaileentzako bi urteko prestakuntza sakon eta luzea oso garrantzitsua izan da, euskaraz aritu izan naizelako, eta oso pozik. Bost urtez aritu naiz horretan.
Zalantzak sortu izan zaizkit, kateatuta gelditu ere bai... baina erronkari helduta beti. Hori bai, beti dokumentazioarekin, ez airean, besterik gabe. Tailerista moduan, gainera, egunero dokumentatzen dut nire lana irudiekin, argazkiekin eta hitzekin, eta horietaz baliatzen naiz jendaurrean hitz egiteko, dokumentazioak asko laguntzen baitit hitzak kokatzen eta sentitzen dudana partekatzen.
Ondoren, Nafarroako Unibertsitate Publikoan hasi nintzen eskolak ematen, gaztelaniaz aurrena, eta gero euskaraz emateko eskatu zidatenean, baiezkoa eman nuen, Hik Hasikoekin esperientzia banuelako. Aldi berean, Iruñeko haur-eskoletan ere euskaraz hasi nintzen, eta baita etxean semeekin ere jaio zirenetik. Lanean eta etxean, euskara txertatu nuen nire bizitzan, modu orokorrean eta politean.
Aukera profesionala emateaz gain, euskara nire bizitzan sartu zuen Hik Hasik, eta nola ez, Joxe Marik, bere egiteko moduarekin. Zeren harekiko harremana ez zen profesionala bakarrik, egoteko modu berezia zuen, eta horrek ere asko eman dit: euskaraz aritzeko testuinguru informalagoak eskaini zizkidan, eta oso baliagarriak izan dira niretzat, bai harremanak sakontzeko, bai euskara beste esparru batzuetan erabiltzeko. Euskaraz aritzeko erraztasuna eman didate testuinguru horiek, eta beldurra galtzeko aukera ere bai. Asko gustatzen zait jendearekin solastatzea, izugarri, eta ederra da euskalkiak eta doinu askotarikoak entzutea, plazera.
Ibilbide polita egin dut euskara nire bizitzako hainbat arlotan txertatzeko, Hik Hasiren laguntzaz beste mundu bat ezagutzeko eta bertako partaide izateko.

2021-04-01